بدري عليَّ همك وقاسي صروده
والعلقم اللي كان وقتي مخفيه
أحلام وآمالٍ عليك معقوده
ظنيت معها.. فاقد الشي يعطيه
كنت أنتظر وأقول تصدق وعوده
على الوفا اللي صادق الحب يرجيه
ويوم أظهر الخافي زماني بكوده
قلت آه.. ما فاد العتب والمشاريه
وين الوفا والصدق.. نوره بزوده
يجلى ظلام الكذب.. يفضح معانيه
وين الضمير الحي.. وآخر جهوده
يوم إنه يدور على قلب يطريه
جرح المشاعر لو رضي به بروده
أجزاه بفراقٍ به النار تصليه
عشنا عمر مررّ حلاته جحوده
واللي جفا ما ظني العين تبكيه
من باع خلٍ صادقٍ في عهوده
لازم عذاب البين بالبعد يشريه
اللي تعدى بالتكبر حدوده
ما تزرع أيامه تحصده لياليه
