تكسري يا رعودهم في هضابي
تلامعي يابروقهم في عتيمي
أنا أديم الأرض رحبٍ جنابي
وانا السما يا كثر صحوي.. وغيمي
تجولوا في عالمي وفخرا بي
وتظللوا يا عل يقرب سديمي
وتطايروا مثل الجراد بسرابي
تعلقوا مثل الرماد بمسيمي
واليا تعبتوا.. فاظهروا من ثيابي
مثل الرماد.. ومثل عطرٍ قديمي
يا من كسر في غفلتي قفل بابي؟
شبيت في طلحي.. وجفَّلت كريمي!
والله ما تسوى مواجع عتابي
انا خصيمي الوقت ما انته خصيمي
يكفي وهبتك صفحةٍ من كتابي
حشمتها عن كل قولٍ سقيمي
لا واسفا بالشعر لا واسفا بي
يا قلب لا تجزع ويا نفس شيمي
لو ما فرح بي هالزمن واحتفى بي!
فالله يعلم ان احدنا عظيمي!!
