البارحة جتني علوم اتشيبي
تشيب صغير مع كبير بالاذهان
اسمع عبر الاقمار علم غريبي
بث الخبر ومن الخبر علم مازان
قالوا حدث تفجير بامر عجيبي
بارهاب واجرام وزعزاع سكان
راحت بها انفس والشريده صويبي
جمله بشر راحوا بظلم وبهتان
بفعلة ردي الدين وايضا النصيبي
متسمم بافكار حقد وعدوان
سوله الشيطان بامر مريبي
شكله بشر والفعل من فعل شيطان
وش ملته وش مذهبه ياخطيبي
لاهوب لا مسلم ولا هوب بانسان
ابشر بنار تصطلي باللهيبي
يقاتل انفس دون ذنب وبرهان
فاكتب يا كاتب وانتفع يا الاديبي
جتلك الرسالة رمزها فوق عنوان
حنا العرب مافيه شك وريبي
يشهد لنا التاريخ مع مر الازمان
نحكم بشرع الله وسيف عطيبي
وحق عطي مثل القمر في الدجا بان
شعب وحكومة عن لاما تغيبي
في ظل من هو دايم الدوم سهران
في ظل ابو فيصل عدو الحريبي
وعضده ابو متعب ومحزمه سلطان
فيا للي بعيد الدار واللي قريبي
هذا وطن عز ولا هوب ينهان
والعاصمة ماهيب دار تخريبي
هذي رياض المجد في نجد بستان
في غيها في حسنها ماتشيبي
تشرق بنور العز من وجه سلمان
قوم مبانيها بضلع وشعيبي
وزخرف محاسنها بلؤلؤ ومرجان
ومن الخليج اليا حدود المغيبي
ومن الشمال اليا وراء حد نجران
بعيش ورغد عشنا وعز وطيبي
وامن كسانا عم في كل الاوطان
فياللي مريض القلب جاك الطبيبي
ابشر بطبك كان لك قلب مرضان
ابشر بعسفك والعقال القطيبي
وخطام مع خيه ولك وجه منهان
اخوان نوره مطوعين الصعيبي
ال سعود منزحة كل خوان
في حكمهم ما يقبلون الغضيبي
في دارهم ماله معزة ولا شان
انشهد ان العود حكمه مصيبي
وخذوا بحكمة دون زود ونقصان
الذيابه تفعل ومن نسل ذيبي
والذيب ذيب ويعرف الذيب سرحان
ابنطلب اللي للدعاء يستجيبي
الهنا اللي عاثر كل فتان
الهنا اللي طالبه مايخيبي
انه يعز الملك ويعز الايمان
في آخر كلامه واسمعه ياللبيبي
هذا وطنا مايقدر بالاثمان
