أنا وقلبي والزمن والمعاناه
مدري نخون الحب وألا نصونه
لو كل منّا ياخذ اللي تمناه
أبا خذه وأنتم خذوا ما تبونه
من نظرته أفهم على طول مغزاه
وأفهم كلاماً فيه ما تفهمونه
آخذ كلامه وأحفظه وآتحالاه
بالذات لا صارت تكلّم عيونه
خافوا من الله لا تجيبون طرياه
القلب من طاريه جنت جنونه
خلوني آخذ سجة الحب وياه
يقبل طعوني وآتقبل طعونه
أكذب على نفسي إذا قلت بنساه
لا تجرحون القلب لا تجرحونه
الوصف وصفه والحلايا حلاياه
أخاف اوصف ياقف الوصف دونه
والله ما عمري تمنيت فرقاه
لا تعذلون القلب لا تعذلونه
تكفون خلوني أبا أعيش دنياه
والله ما تسوى حياتي بدونه
