إلاّ بخير وألف نعمه ونعمه
والكل متأكد.. وعارف.. وشايف
أنّا وطن كله محبه..ورحمه
وأنّا ملاذ لكل لاجي.. وخايف
الأمن فينا مرتفع دوم سهمه
وما هَمَّنا.. من تمتمات الشفايف
واللي بلغ زعمه على حدّ زعمه
أنَّه يلحّقنا.. هموم وحسايف
يخسى وحنّا نقدر ندقّ خشمه
ونقول علمك يا اسود الوجه.. زايف
ومدام ربي حط ها البيت باسمه
يرقى له مصلي.. وينصاه طايف
واكرم يدينا في عماره ونظمه
واختارنا لاعمار بيته خلايف
لا ما نخاف.. ولا نفكر فعتمه
دامه معانا فوق سبع الصحايف
ولا ما نخاف.. ولا رخى العزم عزمه
مادام أن الأمن يرعاه نايف
ذيبٍ تعلّى ذروة المجد.. رجمه
ما يستظل إلا.. بحد الرهايف
نايف يذوِّق راعي الغدْر سقمه
ويعلِّمه علم السنع والنكايف
حاشا نسمِّي راعي الغدر خصمه
الدون وش جابه لسيد الوصايف!
عنده شراذيم العدى.. مثل نسمه
تمر ما حافت من العز.. حايف
ما شكلوا هالشرذمه.. عشر همّه
ولا يحسب حسابهم.. بالكلايف
واللي نوى بالأمن ضربه ولطمه
يلطمه لين يصير للغدر عايف
تبي اختصار القول.. نايف على اسمه
والكايدات بعرف نايف.. خفايف
ذا سيدي نايف سقى الله وسمه
له في قلوب الشعب دار ومصايف
على العدى ومن غَرّه بليس نقمه
وللخير باني للمعزه.. مضايف
نايف تخلد سيرة المجد.. اسمه
واللي يطول المجد سموه نايف
