ليت الشباب يعود وأيامه تعود
ونفتح مع الأيام صفحة جديده
ونعمل ونبذل بالعمل كل مجهود
واللي بقى من وقتنا نستفيده
قدام يومٍ فيه ناشد ومنشود
ناسٍ تعذبه وناسِ سعيده
يالادمي عمرك محدد ومحدود
وسود الليالي تنقصه ما تزيده
والبيض تاخذ مثل ما تاخذ السود
من عمرك اللي لا تبطا شديده
مير انتبه قدام لا يابس العود
اليا يبس حتى السقى ما يفيده
والموت مالك عنه لو طرت مصيود
العبد لابد المنايا تصيده
والجسم عقب الموت يرعابه الدود
والروح يبقى لين ربي يعيده
وما قدمه يلقاه قدام مرصود
من خير والا شر يلقى رصيده
يلقاه في ميزان الأعمال موجود
في ما قف فيه الخلايق زهيده
يوم الجوارح كلها فوقه شهود
سبحان من يحيي العظام الهميده
