مبطي ونا من هاجس العشق محروم
واحتاج اضم انسان ينبض وريده
انقذ حنين بالحشاشبه معدوم
اصارع امواجه وينقص وزيده
يكفي خيال ماله حدود ورسوم
لازم نعيش الواقع ونستعيده
ارهقتني والحين ما باقي عزوم
وما جيتني عمرك بفرصه سعيده
بين البشر واقف معي حلم مهدوم
واهرب من الحرمان وارجع نديده
ولا روعتني عدة أفكار وهموم
تنزف من الذكرا جروح عديدة
وذيك الحقيقة تضطرب شك وعلوم
وعجزت للقا فيك جمله مفيده
شوف الحبايب كيف عادات وسلوم
وحكم الهوا يستلطفونه قصيده
تعال عانقني كما انفاس مفطوم
هيا انتجاذب بالظروف العنيده
نوخ ركابك لا تخوف من اللوم
نذرت ما عاتب من اصافح ايده
ان كان ودك نلتقي قم وباقوم
ولا انتجافا لدروب البعيده
اللي جرا فينا من الله مقسوم
والآدمي خطيه ورى ما يريده
ليتك ترسينا على برك اليوم
وكل بعدها حد اذا انفك قيده
"مدارات شعبية"