يقول العمودي يوم هبت هبوب الشرق
سلامي على من طال بعده وخلاني
سلامي عداد الغيم وعداد ومض البرق
عليكم ونار الشوق بلحيل تصلاني
حبيبٍ حرق قلبي بنار الموادع حرق
تركني وحيدٍ دايم الدوم حيراني
حبيبٍ على كل الغنادير حاز الفرق
له عيون في نظراتها تخلف أوزاني
لمحته وقلبي من لمحته غدابه سرق
يسوق القدم بغرور واللبس فتاني
ألا ليتني من ربعها لو بعيد العرق
أبيها على السِّنة وتال العمر فاني
تركني أفكر واحسب البيض مثل الزرق
على ذكر توصيفه تركني بالأحزاني
أجوب الديار وقاطعٍ لأجل عينه طرق
وأجيب القصايد لأجلها بشتى الألحاني
وأجاوب على ذكراه دايم حزين الورق
واقول إنت وينك يا بعد كل خلاني
زرقني برمحه في صميم الضماير زرق
وأنا أقول جرح الزين لو طال يزهاني
ألا ليتها ما ذكرتني هبوب الشرق
ولا صرت عن كل المخاليق وحداني
"مدارات شعبية"