يا قلبي ليه حبيته.. وليه اكشف له أحوالي
وليه أفتح له أبوابك تعيش أجمل هوى وياه
نسيت جروحك ودمعٍ نثرته يرثي آمالي
نسيت إني أعاني جرح قاسي ما لقيت دواه
تعرف إني إذا حبيت أبي حبٍ لي لحالي
تعرف إني من أغليته أموت ولا تجي فرقاه
وأنا يا قلب أدري به وأعرفه ما بيبقى لي
بعد سنتين بيودع بعد ما يمد لي يمناه
شرح لي ظرفه ووضعه وزاد بدمعه غربالي
وقال إنه يموت بشي أمل داست عليه خطاه
أنا أبا أنخاك يا قلبي إذا بتهمّك أقوالي
يا قلب ارفق على عمرٍ جريح من أوله لأقصاه
ساعات أحس يا قلبي بانك حيل متعالي
تحاول تخفي إحساسك ولو تحرمه نيل مناه
وساعات يشدك إحساسك ولا في جرحك تبالي
عشان تعيش لحظاتك مع اللي بالهوى تبغاه
حروفه جد ما غابت أبد في يوم عن بالي
حروفه تسري بدمي ولا يمكن فيوم أنساه
أحبه يشهد إحساسي وشعر دون أفعالي
أيا لبيه يا حب بروحي.. والعمر يفداه
ولكن تكفى يا قلبي طلبتك بأول وتالي
تحاول تضبط إحساسك يكفي صاحبك ما جاه
بيبقى عندك وعندي حبيب ومسكنه عالي
بيبقى نور في دربٍ شكينا ظلمه وبلواه
بأسمّيه الغلا كله لأنه فعلاً الغالي
وأبا أعطيه أجمل إحساسي وقلب عايش بذكراه
أمل الرجيعي
(رهينة) | 
"مدارات شعبية"