بديت باللّي من ترجاه ما خاب
بسمه بدينا بالبيوت الرشادي
اللّي خلق خلقه من الطين وتراب
امقدر الأقدار رب العبادي
جاني خبر زلزل كياني والأعصاب
يوم الخميس اللّي به الهم زادي
قالوا (محمد) مات يا عز الأنساب
ابن الفخر وابن الرجال العمادي
ننعاك من كل القرايب والأصحاب
وقلوبنا صار الحزن به وقادي
من فقدها له كنّها تقول بعتاب
تقول وين الصقر وين الهدادي
وجد وحنان للبطل بعد ما غاب
تشكي من الفرقى ولوع البعادي
ياعين هلي واذرف الدمع سكّاب
على فقيد سيرته فل.. كادي
ما طولك يا ليل به الهم جذاب
اجذب ونينه لين عفت الرقادي
الموت حق وكل نفسٍ لها حساب
يالله عساه بجنة الخلد بادي
اغفر ذنوبه وجعل القبر مرحاب
روضٍ بها روحه تنعّم مدادي
وختامها صلوا على خير الأحباب
نبينا المرسول للناس هادي
"مدارات شعبية"