يا سعود أنا كني على الكبد منحور
تالي شهر شعبان هو ورمضاني
والفطر زال وخاطري صار مكسور
وسبت عدم رؤياك حزن طواني
طيلة غيابك صرت ماني بمسرور
تسهر عيوني والكرى ماهناني
ماكني إلا ساكن يم دارفور
مجاعة السودان ليه مكاني
ودي بشوفك يا ذرى كل منعور
وأرافقك لو الظروف تحداني
ياما مضالي معك يا سعود من دور
عشرين عام وكنهنه ثواني
وانته لنا من قدرة الله كما النور
تعطف علينا بالقسى واللياني
أنا اشهد انك بالرياجيل مشهور
كنك يا بو خالد سهيل اليماني
سمعتك في وسط الجزيرة لها طور
مشهور طيبك يا عريب المجاني
من اليمن لحدود عرعر وابا القور
يا سعود ما توصف على مودماني
دوله بدوله لك مكانة وجمهور
وتصعد على رؤوس العلا والبياني
يا سعود ما حطيت للباب ناطور
بيتك يجيله كل قاصي وداني
كم واحدن قاللك يا سعود مشكور
راع الحساني ينجزي بالحساني
جعل الذي عقبك في جنة الحور
وعسالا يسكن في نعيم الجناني
وصلاة ربي عد ما هل شختور
على نبي للصراط يهداني
صراط من ينجون في نفخة السور
ليا استعانوا بالله المستعاني
"مدارات شعبية"