هبت هبوب القصيد وذعذعت نوده
والكف نقشت على الدفتر مخاييله
والقاف شبت بصدري نار سفوده
والشعر في ضامري لجت مواويله
منساه فهد الفهود اللي ذكر جوده
وغطى على سيل وديان العرب سيله
من جد جده وجد الجد وجدوده
المجد فيهم وهم فطروا على شيله
هو فزعة اللي وطاه الظلم بحشوده
واللي سقاه الزمن الأسود غرابيله
هو نخوة اللي برجله شابت قيوده
من هم في هم ما تنشف مناديله
هو عزوة اللي بكى لفراق مفقوده
يمسح بكفه دموع الطفل ويميله
العمر ينزاح يوم تزمجر رعوده
والصبح ينباج لا هلت هماليله
من يقصده ما يرد إلا بمقصوده
في كل مضمار تسبق للوفا خيله
ودي ازوده ولكن ما اقدر ازوده
هو قمة المجد ما توصل مواصيله
على الكرم كان تبغي تعرف شهوده
تشهد فحوله ويشهد بنه وهيله
عدر قراح نصدر منه ونروده
رجم طويل يقبل في مقاييله
الزرع ما يثمر إلا لا قوى عوده
وهذا من المهد مثمرة محاصيله
إليا نطق ينصت العالم لما روده
فرض على الخصم يسمع له ويصغى له
لا مد ما أحد يمد بعشر ممدوده
وان كال بيكيل كيل ما نكل كيله
إن كان تبغي نهاية قصة صعوده
نجم الثريا وطاه وعانق سهيله
إليا عطى يرتوي الضامي من عدوده
واليا اعتزى هامت التاريخ ترخي له
لا زاد طلاب جوده زادت رفوده
مثل البحر ما يضيق يكثر اساطيله
يشيل حمل على منكبه وعضوده
لو شال معشاره العارض فتر حيله
لولا تشهده والتهليل في سجوده
ما قال ابد (لا) في جده وتهزيله
لا فاض جوده تعدى عالي سدوده
ولو سال سيله على مصر غمر نيله
من يزرع الخير يجني ناتج جهوده
ومن يزرع الشر يقع في محابيله
الشعر وش قيمته وش نفعه وفوده
ان ما جعلناه في مدحه وتبجيله
الشعر عسر زمامه كايد قوده
واليا مدحت الفهد يساهون تذليله
ترى الوطن لا زهمنا كلنا جنوده
الموت في ساحته نشرب فناجيله
لا من نهار المعارك ثار باروده
نشفق على الموت وان ما جالنا نجيله
يمشي على خطه الصهيون ويهوده
في كل يوم يتبين زيف أباطيله
هوليودهم ما يلحق كذب هوليوده
والفار نعرف مخارجه ومداخيله
ممسوخ منهج عدمه يساوي وجوده
على علمه الصليب وختم أناجيله
في منتنات الجيف تستأسد الدوده
اعوذ بالله من نهجه وافاعيله
أمة محمد بنصر الرب موعوده
حطم جيوش ابرهة بطيور ابابيله
الشعب جدد لكم يا قادة عهوده
وهذي القصيدة رسالة من مراسيله
احب رمل الوطن واقبل نفوده
واهوى براريه واعشق منظر نخيله
خمس وثلاثين بيترجتك مسروده
والزود في الذاكره ما تم تحميله
"مدارات شعبية"