يانفس ويش فيك طول الوقت مهتمه
كفي عن الهم كافي ماحصل كافي
وش لك بهم يسل الحال ويسمه
والرزق عند الكريم اشكال واصنافي
وأنا على الله حبالي تاصل الجمّه
واشرب من الماء الزلال المنهل الصافي
مسلم وأصلي صلاة الله على اليمّه
وأسرى على النور الأبيض وأرسم أهدافي
يا قائد الريم ما في ذا الزمن ذمّه
ولا أنت ما صار منك قصور وخلافي
لكن ظروف الليالي جات بمطمّه
ولا أنت وافي عمرك دايمٍ وافي
حلم تبعثر ولا أدري كيف بلمّه
ما بين جور الزمان وحظي الجافي
وجدي توجّد مجلّي مهدر دمّه
يقطع فجوج الفيافي والقدم حافي
حده زمانه على ذبحة ولد عمّه
في ليلة من قشرها نورها طافي
ولاّ رضيعٍ حرمه الوقت حضن أمه
يمسي ويصبح بدون فراش وإلحافي
عليك ياللي تهد القلب وتخمه
خمة نشيط مثل ما قيل متعافي
يابو جديل يحس الأرض وتضمّه
يا بلسم جروح روحي والشفا الشافي
اليوم من راح ما ألد النظر يمّه
ندور الستر من ستر الله الظافي
لولا اختلاف البشر والدين والذمّه
ما شفت الأيام فيها ظلم وإنصافي
من ضري بالقاع ما يستاهل القمّه
والليل ليلين ذا بارد وذا دافي
اصرّف الحرف بالهمزة وبالضمّه
شاعر مع الوقت متفاهم ومتنافي
"مدارات شعبية"