البارحة ليلي هواجيس وهموم
والدمع يجري بالخدود ووسمها
وسم يخلي الحال والفكر مسموم
والحال لذات المذاق يحرمها
ليلي غدا كله كوابيس وحلوم
يوم العباد رقود محدٍ نهمها
تبكي عيوني ما تهنيت بالنوم
وان قالوا العذال ليلتك نمها
اقنب قنيب الذيب مانيب مليوم
والرجل حارت في مكاني قدمها
من بعد فرقى ابوي والقلب مثلوم
خطر يروح والضلوع يهشمها
ابكي على فرقاه والحال مهموم
والهم ناره بالضماير شعمها
كني عقب فرقاه تايه ومنجوم
مصيبة ترمي علينا سهمها
والعبد تاتي له مقادير وقسوم
الله كتبها للعباد وقسمها
وما قدر الوالي على العبد محتوم
حتيش لو انك بعالي قممها
يا الله يا المعبود يا فارض الصوم
تجعل مقره في الجنان ونسمها
ويا الله عساه بداخل القبر مرحوم
وتغفر ذنوبه يا عليم علمها
وجعله سعيد الحظ ما هوب محروم
يا كاسي كل العظام بلحمها
والموت حق وكل نفس لها يوم
يوم يجي للنفس ياخذ نسمها
ما باقي غير الولي دايم الدوم
سبحان خلاق البشر من عدمها
وصلاة ربي عد ما ينبت الدوم
على النبي بازكي الصلاة نختمها
"مدارات شعبية"