باسم ربي بديت اكتب قصيده
باسمه الواحد أبدا واستعيده
هو اللي بالثنا والحمد بادي
هو الرحمن يفعل ما يريده
على ما دبر الباري مشينا
وعلى ما دبره تمشى عبيده
أخاوي ليلي الصامت بقافي
وابوح بهاجس النفس العنيده
اليا باق الصحيب وباق وقتي
تحديت المكيده بالمكيده
اثبت حجتي قبل احتجاجي
وراعي البوق بوقه ما يفيده
غريب وشفت بالدنيا غرايب
غرايب لو أعددها عديده
مشينا مع هوى التيار نسعى
بلا تركيز واهداف حميده
تركنا سلومنا واسلوم أهلنا
وغدا سلم العرب ماله شريده
وتناسينا المروة والشهامة
وتخلينا عن اسلوم البديده
وقل الوصل من بين القرايب
وكل منا قريبه هو ضديده
وتعالينا على من قل ماله
ومشينا خلف من زاد برصيده
واليا جينا نبي نصلح خطانا
دخل من بينا شين العقيده
وفرق شملنا بعد اجتماعه
وخلا بيننا مثل الوقيده
ولبسنا الجنز واسبلنا شعرنا
وكعب عالي سمعنا له رجيده
واليا شفنا مع الشارع سماره
مثل صياد يوم يشوف صيده
وتبعناها على قلة بصيره
وقلة ذوق واشعورٍ بليده
وكلٍ مجتهد في مدح نفسه
وعند اللازمة ما من صميده
هذا اللى واقعٍ في مجتمعنا
ولولاي اتحفظ كان أزيده
"مدارات شعبية"