أبعد عن اللي كل ما رحت يمه
قلطك لكن ما يلقي لك البال
إما مسك ملحق جريدة وخمه
يقرا سطر ويقول لك كيف الأحوال
وإلا معه طفل صغير ويزمه
ويلاعبه عندك تقل مانت رجال
وإلا تذكر صاحبه وابن عمه
وأخذ ربع ساعة يكلم بجوال
وأكبر دليل إن جيتك ما تهمه
تشوف بحجاجه كما عقدة حبال
بارد كلامه.. واستقباله.. ودمه
لو صب لك من دلة البن فنجال
ارفع مقامك واتركه لا تذمه
يلقونه اللي ما يدانون الأنذال
هذي نصايح في تجارب مهمه
هي للرجال ويستفيدون الأطفال
"مدارات شعبية"