جادل ان كنت تقدر لو يطول الجدال
وربي اللي خلقني ما خلقني جفول
اعتبر ان ليلك مات فجره وطال
وان يومك زمانٍ سرمدي الفصول
دون حقي سكوتي من صميم المحال
وكيف ابسكت وطبعي ما عرفته خذول
أحمد الله عزومي قوةٍ من رجال
كل واحد بعشرة تنتخي به فلول!
شلت همي صغيره حمل مثل الجبال
والله اللي بعونه كل هم يزول
ماظهر الضعف حيلة خصلةٍ من خصال
اعتمدها بعمري لا اعجزتني الحلول
وما اقبل براي غيري فرض والا احتلال
وما قبلت المهانة فعل والا بقول
دام ديني دليلي مع حميد الفعال
وش يهم الأصيلة من كلام العذول؟!
ودام كلي وضوح ودام دربي عدال
ما تضر المسافه لو تمد وتطول
ودام شعري صديق يستشير الخيال
وحدتي ما احزنتني لو صديقي خجول!
ما تركني (شقيق الروح) وحدي خلال
رحلتي، وبفضاء الكون فيني يجول
ولو عصف حزن قاسي بالخفوق اشتعال
ديمة الشعر تسعد خافقي بالهطول
وكلما قلت نبذة موجز او قل مثال
عن حياتي وانا ادري فيك شخص عجول
(بالتأني السلامة) كل وقتٍ وحال
لا تسرع بحكمك رفض والا قبول
وخل صدرك وسيع وللتفاهم مجال
وراع نوع الثقافه واختلاف العقول
ولاحظ ان كل موقف عندنا له مقال
وان فرق الطبايع باختلاف الميول
"مدارات شعبية"