البارحه ساهر كني على مله
انس بها في كنين الجوف تصلاني
والعين تنثر غزير الدمع وتهله
عبر تخج الضلوع تقول بركاني
ما لومها لو تهل الدمع ذا كله
حيث انها خابرة ويش اللي أبكاني
ابكي على الشايب اللي وارف ظله
في فيته ينعم القاصي مع الداني
ويبكي عليه الرجال اللي على المله
كسابة المراجل ذربين الإيماني
وسكان بيت الشعر مع ساكن الفله
يبكون مدهال بدوان وحضراني
ويبكيه ضيف مكانه دايم يدله
لا جاه خالي المذاهب قاصد عاني
يلقى الكرامة ويلقى كلش فله
عود وبن وهيل مع شحم ضاني
ويروح ينشر له البيضا جزاة له
الين حاز النعم في راس ما باني
ويبكي عليه الصحن والنجر والدله
ومجالس شيوخ ملفي كل ديقاني
الله ما أكبر مكانه عند خلق الله
يا وين يلقى مكانه واحد ثاني
ان جيت للدين لا دينه على المله
حج وصلاه وزكاه وصوم وايماني
خمسة وعشرين عام ما اختلف لله
صوم الشهر في الحرم لو كان مرضاني
مقابل البيت يستغفر من الزله
وقيام ليل مع ترتيل قوراني
يا ما مشى للحرم يشكي من العله
يصبر ويمشي تجلد والجهد واني
وان جيت للمرجله ما له نديد له
يشهد بها الاجنبي وفلان وفلاني
وان جيت للهرج لا هرجه على حله
لا فيه لا زايد ولا فيه نقصاني
لا جاك بالسالفه ماهيب مختله
ما يقطع السالفه يا كون الاذاني
ويوم أن غيره عجز في الحمل ما شله
شله عديم الوصايف فوق الامتاني
عشرة يتامى من النيران عتق له
ياالله عسى له بها في عدن مسكاني
الموت كاس وكل الناس معتله
دين ويطرد ورى المديون دياني
لكن نفسي على فرقاه معتله
ويا طول فرقى الذي لفوه باكفاني
فيالله يا جامع خل مع خله
يا عالم الغيب يا خالق الاكواني
إن تقبله يا وسيع الحلم وتحله
وتحط قبره نعيم وروضة جناني
في ظل عرشك طلبتك يالله تظله
أبو اليتامى عسى له عندك كناني
مكرم الضيف يالله تكرمه يالله
حيث الجزا بالفعايل وانت رحماني
ويالله عسى الغيث لاجا قبره يعله
والله يجازي هل الحسنى بالاحساني
وصلاة ربي على محمد وصحب له
ما لاح براق ليل وهل وداني
"الرأي"