يمه كفوفك رعشته تشقي الحال
ومداتها تمسح دموع اليتيمه
قلب الحنان اللي به الحب مدهال
أمٍ حنانه كنها امطار ديمه
أيام مرت والقمر عود هلال
والشمس يحجبها عن الكون غيمه
أمٍ شموخه راسيٍ كنه جبال
لو هي تعرض للمرض والهزيمه
أمٍ عطاها يحيي احلام وامال
قلب الوفاء فيه النوايا سليمه
أمٍ بعيده عن ردا القول والقال
ماله بهرجات القفى والنميمه
(يايوه) شلتي همنا صغار ورجال
وياما تحملتي من الوقت ضيمه
(يمه) سمعنا في سما الحب موال
لحنه تردد بالقلوب الاليمه
(أمي) بدونه صايبٍ عقلي هبال
والبيت من بعده غدا دون قيمه
من غيبته والهم والحزن بي طال
وروحٍ تحبه من مرضها سقيمه
والعين هلت دمعها يهمل إهمال
لو ماتهله قلت عيني غشيمه
(يمه) تطيح قلوبنا تحتك ذلال
نبضاتها.. بر.. وموده.. وشيمه
تفداك (يايمه) ونفداك بالمال
وترخص لك الارواح حب وحشيمه
وندعي لك اللي عالمٍ كل الاحوال
محيي عظام الناس لو هي رميمه
يشفي مرضك ويحفظك يوم الاهوال
في يوم ما ينفع حميمٍ حميمه
ويجعلك بالجنات في روض وظلال
(يا أم) الجميع أم المزايا العظيمه
"مدارات شعبية"