يا زين مالي في هوى غيرك امراد
قلب العنا يا زين ما هوب ساليك
القلب من عقبك طرا فيه وقاد
بالله دربك وينهو وين اراضيك
ابيك انا لو كنت من دون بغداد
يا زين انا كلي ترا هايماً فيك
اجيك انا غصبا عليه ومنقاد
وشلون بعت اللي يودك ويغليك
اشوف طبعك صايرا كبر وعناد
من زود كبرك ما تصافي مصافيك
ياما نهيت القلب والقلب يزداد
مجبور في حبك وهو منك ويليك
ياما كتبت الشعر لجلك ولا فاد
ياما هتفت بعالي الصوت اناديك
من كثر همي ماهتني لو بالاعياد
والظاهر انك ناوياً لي تهاليك
مغير اهوجس فيك في كل مقعاد
وشلون اعسف النفس واقول مابيك
"مدارات شعبية"