ليتك معي وتشوف حالي بلياك
وتشوف دمعي كيف ينزل سكايب
غديت ما بين العتاب وجفيّاك
وقلبي من الهجران والصد ذايب
اتعبتني يا كامل الزين وياك
واتعبت قلب شاف منك المصايب
كل ما اسج يضيع فكري بطرياك
تقفي وتقبل مع نسيم الهبايب
يا وجد عيني كل ما ذكر حلاياك
كني اشوفك حاضر وانت غايب
اصبحت من جورك وجملة خطاياك
جسمي شباب وداخلي صار شايب
ان كان غير الصدق تخفي نواياك!!
انا اسوق الصدق ما به شوايب
يا ويل حالي كان بانت خفاياك
انا اشهد انك صرت كلك عقايب
المشكلة!! لا صرت هاوي كواياك
ارفق علي شوي ما دمت طايب
لا قلت احبك عايش وسط دنياك
لا لا.. ترجعني من الشوق خايب
ماني بمنكر يا حبيبي عطاياك
بس انت لا تنكر قلوب الحبايب
اياك يا مضنون واياك واياك
يصبح غرامي من تجافيك هايب
فالح الشلوي
العمر قاضي
"مدارات شعبية"