خطب جلل زعزع قلوب الملايين
حزن طغى ما به لوصفه احدودي
باسباب علم زارني يوم الاثنين
في ساعة يا علها ما تعودي
نجم أفل يا الله على فقده اتعين
مات الزعيم الشهم فهد الفهودي
كن السحاب اليا انهمر دامع العين
والحزن خطر لا يفت الكبودي
عليك يا مالك قلوب المسلمين
يا مسخر للدين كل الجهودي
تشهد له الأمة وتشهد فلسطين
ومكة وطيبة والمصاحف اشهودي
وتشهد له الحكمة بكل الميادين
في السلم والا عند زحف الحشودي
لا ثارت الهيجا سواة البراكين
لا قيل وين اللي يحل العقودي
يا ما سهر بالليل والناس ممسين
من هم الأمة ما هتنى بالرقودي
حتى رفع شان العرب عند الاقصين
والشعب من مدات جوده يزودي
من شرع ربي يستمد القوانين
وصاة عود نفذت بالبنودي
امانة توارثوها سلاطين
واليوم يمك يا بو متعب تعودي
كفوٍ لها توفي بكل الموازين
وسلطان جنبك يسندك بالعضودي
واليوم جينا يا بو متعب معزين
ومبايعينك بالقيادة تقودي
ناديت شعب جاو يمك ملبين
جتك الوفود اللي وفت بالعهودي
والشعب كله بايعو لك مطيعين
الحكم لله ثم لآل السعودي
القلب واحد رغم كل الحسودين
واكبر دليل في ازدحام الوفودي
بيعة ولاء تحسب علينا من الدين
شريعة ما يوم عنها نحودي
تجري بنا في الدم جوف الشرايين
متوارثه من يوم عصر الجدودي
فيا الله يا مقصد قلوب المصلين
يا مستجيب اللي دعا بالسجودي
تسكنه في الفردوس بين النبيين
ضمن العباد الصالحين معدودي
وصلاة ربي عند نبت البساتين
على النبي اعداد ما هب نودي
"مدارات شعبية"