لا تبخلين بغالي الدمع يا عين
اليوم يوم الزفره المستثيره
هلي دموعك وانثري لا تراعين
والى نشف دمك وراه السريره
جيش من الأحزان غطا الميادين
واردف جموعه فوق كل الجزيره
من كل صوب تستمع صوت باكين
تناوحوا في كل وادي وديره
مع البكا تسمع تضرع وتأمين
ترفع يدين بالرجا مستنيره
في ساعة يفزع بها راعي الدين
ما له ملاذ غير ربه يجيره
مصيبة حلت بنا يوم الاثنين
في خادم البيتين ودع سريره
جماد الآخر يوم ستة وعشرين
اربع ميه والف هموم مغيره
في عامنا سته وعشرين تعيين
شاع الخبر بين الجموع الغفيره
غادر وحنا للخبر مستصيين
ما كنه الا حلم ما له جريره
حتى سمعنا به بيان وتبيين
زالت به الأوهام واشعل سعيره
قالوا ملكنا زاره الحق باللين
رد الأمانه عقب راحة ضميره
باربع ميه بعده من الوقت عامين
هو مبتدا عهد من الخير نيره
حسبه زمان اربع وعشرين تموين
ومن الرضا راحت علينا قصيره
فهد زعيم العصر زين على زين
بين العرب حل الامور العسيره
فهد امام المسلمين الموالين
اللي على هدي النبي مستشيره
فهد امام العدل بين الموازين
للشعب غيث ولليتامى بريره
فهد رفع راس السعودي بتمكين
سطر معه بالشرق والغرب سيره
ما ينحصي فضله بكل العناوين
في مبتدا كل المواجيب خيره
ارسى مسار الامن حين بعد حين
وانجز مشاريع النمو الكبيره
عنده سبيل الخير فوق الصلاطين
يبي من الله في حسابه ذخيره
يكفي له المصحف شهاده وتدوين
والا مبراته من الله كثيره
تخلص له الدعوه جموع المعزين
عقبه تجي كل المصايب صغيره
في رحمة الله في جوار النبيين
حيثه قضى عمره بنور البصيره
كل العزا لاولاد فهد الميامين
واخوانه اللي يكملون المسيره
حنا عزانا فيه حكمه وتضمين
عبدالله اطفا كل دمع غزيره
خير الخلف للشعب نعمه وتوطين
يكشف بعد خير السلف كل حيره
معه ولي العهد عز المحبين
سلطان ما ترضى الأمانه بغيره
حنا نبايع راية الحق راضين
عقب المؤسس حلقة مستديره
صلوا على خير العباد المصلين
مع السلام الله يديم الستيره
"مدارات شعبية"