يا وطن رفرف علمنا فوق هامات السحاب
يوم كل مواطنٍ صوت لبو متعب.. واخوه
مارضينا غيرهم في (قبلة الإسلام) ناب
هم هل العوجاء مقابيس الوغاء للي نووه
بالعدل والحكمه وسنّة نبيه والكتاب
تمشي الدوله واهلها من غلام.. بايعوه
حاكمٍ طيبه شملنا من كهول ومن شباب
من تولانا وخيره شاملٍ كل الوجوه
غيمة الخيرات عمّت واعتلت روس الهضاب
وكل وديان البلد سالت بخيره.. وشكروه
الله يزيده بطول العمر ويزيده صواب
بالسياسه ناهجٍ منهاج فهد ونهج ابوه
كلنا لك يا بو متعب وامرك الصادر مجاب
سمعٍ وطاعه.. يا حاكم كل شعبه عاهدوه
والله إنا معك لو تامر علينا بالعذاب
مانوفي حقك وحق البلد واللي حموه
دولة التوحيد يا دولة رفيعين الجناب
دام فيك (اخوان نوره) مايزعزعك امعتوه
والمواطن مع مليكه واقفٍ في كل باب
ومن يحاول لك يخرب بالتكاتف قاتلوه
ولو يحاول كل ناعق يكرب اطناب الخراب
كلنا له قبضةٍ وحده ولا يقدر.. يتوه
ومن يحاول في ولانا مثل من يطرد سراب
ما يزعزعنا سقيم ولا ربح من أيدوه
يا ملكنا سر على نهجك وحنا لك صحاب
ولا نساوم في بلدنا والرجال اللي بنوه
وانهضوه من الجهل حتى من الأمراض طاب
وبالمدارس والجوامع والمشافي.. أمّنوه
لين واكب بالتطور أكبر بلاد ورحاب
وابهر العالم بفنّه واعتداله.. راقبوه
وبالعدل والحكمه وسنّة نبيه والكتاب
تمشي الدوله واهلها حكم (ابو متعب) رضوه
"مدارات شعبية"