أتعبت رجلي بين روحه وجيّه
كله سبايب جادل شانها شان
حورية سبحان رب البريه
قفت على قلب له سنين شفقان
ونحسب إني بالهوى ما عليه
لين أن نفسي روحت في خبر كان
نظرة عيون الجادل العسوجيه
أشد من سيف فعل يوم الأكوان
ومن عقب ما حب الخفوق بدويه
والله ما أغبط من تعلق بلبنان
عنق يوردني لحوض المنية
وجه يجيب الخير ويزيل الأحزان
وردف عليه الله ما شفت زيه
وسط مثل ما قيل خاتم سليمان
ولا الجديل اللي قليل حليه
لو حاول يغطيه حول الكعب بان
تشبه لوضحاً وردة العيطليه
ومرباعها بين المهمري وساقان
وردة تقود البوش وقت ضحويه
في مقدم الغنطوش دقن وحشوان
خزيزت اللي ما يخلي خويه
يوم الفعول ويوم زوغات الأذهان
أو وردة بين الغصون النديه
قلبي على شوفتك يا الورد ولهان
عذبني المشوار روحه وجيّه
يا إنسان بالله أرحم وحن لإنسان
"مدارات شعبية"