ان دل.. دل انه تواضع من الله
والله الي منك تواضعت يرفعك
ما ينحني شعبك ليدك مذله
مير انت في حسبة ابوه ويجي معك
من مثلك؟ يصرح وهو في محله
من مثل سمحك والعفو في طبايعك
الشعب مختارك بدين ومله
والمملكه تحكي بفخر وتبايعك
يا شيخ فيك الكفو والنعم كله
بس انت سولف بابو متعب ونسمعك
لو ينعقد حبل المواطن تحله
وكل الوطن ياقف لو اشرت باصبعك
تميزك.. خلقه خلقها لك الله
وتواضعك من وين ما رحت يتبعك
عزيز قوم ما تحب المذله
ومن يقدر يخالف كلامك ويمنعك
سيفك على من حب يدك تسله
شيخ على مبدا العقيده تربعك
من قال انا سعودي حجاجه تفله
وجميعنا بحسبة عيالك نطالعك
من جاك يبغي ماك.. ريقه تبله
ومن جالك يسلم.. ما يقدر يودعك
باخلاصك لدينك تبين الاهله
ودنياك من غير الشريعه ما تقنعك
الله يظلك بالقيامه بظله
وبالعافيه والصحه الله يمتعك
لو كل واحد مثل دقك وجله
تلقي التواضع سال من طيب منبعك
ما كل من يبغي علوه وصله
علوك ما خلا لغيرك الا مطالعك
تبقى ورايك باقي في محله
مثل السما واقوى رعد ما يخضعك
تواضعك للشعب (فطره من الله)
والله الي منك تواضعت يرفعك
"مدارات شعبية"