صار الزعل بيني وبينك مسافات
وأنت الذي شبيت نار العداوة
أججتها لين الغلا بخاطري مات
واصبحت عقب اللين مصدر قساوة
من يبتدي بالسو يحصد حسافات
ومن يبتدي بالطيب يلقى غلاوة
من أول الى غبت أعيش ابمتاهات
وإذا حضرت استقبلك بالحفاوة
وان غبت عني يوم كن لك سنوات
واحس كن العين فيها غشاوة
واليوم أردد كلمتي لك بحسرات
أبعد والى لاقيت شرواك خاوه
وانسى زمان قد مضى لك معي فات
ابديت لك صدق الصداقة علاوة
وأنا أتعالى فالصداقة على الذات
وأحس طعم المر فيها حلاوة
غلطاتك من الكبر مهيب زلات
وتاريخك أسود لون عقب الصفاوة
"مدارات شعبية"