يا الله ابفالٍ منك يا طيب الفال
سمعت ما بكاني وغير كياني
سمعت ما كدَر وما عكر البال
علمٍ يكسر بالضلوع المحاني
قالوا توفي صاحبك ذرب الأفعال
وخويك اللي ما يبدل بثاني
خويك اللي للثقيلات شيال
نواف بن مدوخ عريب المجاني
وأمطر سماي ودمعتي تكشف الحال
وسكت من ضيقي وشي كواني
لا والله الا راح زحزيح رجال
لقبل غدت عشر النشامى ثماني
راعي هلا واقلط على حيل ودلال
ولا هوب عن عون الرفيق متواني
خويي اللي لا صطفق جال في جال
عضدي أليا صر الرشا بالسواني
خوي وابن عم وستر وجه وجلال
خوي واعده واحدٍ من اخواني
وسلايل اللي تلبس الجوخ والشال
تاريخهم كنه سهيل اليماني
والموت لو يدفع بالارواح والمال
وقفت دونه لو دحمني زماني
لكن رضينا حكم علام الآجال
باقي ومن غيره على الكون فاني
يا الله تغفر له وترحمه يا عال
وتجعل عظائم سيئاته حساني
وتنجيه من ضيق اللحد هو والأهوال
وتحط قبره روضة من جناني
وعند السؤال اتثبت القول لا قال
وتجبر عزانا فيه قاصي وداني
وتعين ابوه وتجبر الكسر يا وال
والموت حق ومن على الأرض فاني
"مدارات شعبية"