أصيح بأعلى الصوت نايف فقدناك
عساك تسمع صرختي يوم أناديك
أنا أمك اللي عيدها يوم لقياك
ياسعد نفسي لو عيوني تلاقيك
والقلب ناره تشتعل عقب فرقاك
ماتطفي النيران ياكود أياديك
لبست ثوب الحزن بعدك ولاانساك
والنوم ودع يوم غابت لياليك
تاهت بي الخطوات ودروبي أشواك
والدمع من عيني على الخد يبكيك
أراجع الماضي واعيد ذكراك
تشدني الذكرى وابكي لماضيك
سجين بالغربة وياكبر بلواك
الله يعينك دايمٍ في بلاويك
هذا القدر مكتوب .. مكتوب ماجاك
اصبر عسى الله بالنهايه ينجيك
بديار ( بوشٍ ) سجنك الموحش هناك
ياليت لي قدره على الدرب واجيك
ياسجن أرفق مسندي وسط مبناك
ماشاف شمس ومظلماتٍ مبانيك
مدري ياعمري كيف الأحوال وياك
طمني عنك طمّن أمك تحاتيك
من يغسل هدومك ومن قام يرعاك
ومن يطبخ الوجبات منهو يواسيك
ومنهو الذي بالليل لانمت غطاك
خوفي عليك البرد بالحيل يوذيك
ودي قبل موتي مشاهد محيّاك
ودي أضمك في يديني واحاكيك
ياحافرٍ قبري دخيلك رجيناك
تحط فوق النصب نيشان بوصيك
يمكن يحين الوقت ترجع لمرباك
وتزور قبري مسرعٍ في خطاويك
ياسيدي سلطان تكفى طلبناك
ياراعي الفزعات تشكر مساعيك
شلال طيب منبعه دوم يمناك
خيرك مغطي كل بيتٍ باراضيك
وقت الشدايد مالها غير شرواك
يبشر بعزه كل من جاك ناصيك
ياسيدي سلطان حنا فداياك
بارواحنا نفديك نفديك نفديك
الجود وانت الجود يمشي بممشاك
يمشي وراك ويتبعك مايجاريك
يتعبني مدحك لو أعدد سجاياك
والشعر يرفع رايته مايوفيك
يالله عسى المولى يصونك ويرعاك
ويعود نايف ياعسى الله يخليك
أبختصرها ياذرى كل من جاك
"شعر"