يا سيدي سلمان والطيب سلمان
يا مير نجد وسورها يا سندها
سلمت من غدر الليالي والأحزان
ومن حقد خبثين القلوب وحسدها
يا الحاكم اللي تفتخر فيك الأزمان
عند الزمان اللي يجي من بعدها
يا مير مهما قلت في عوب الأوزان
مواقفك ينهي قصيدي مددها
يا خو فهد يا عز شعبك والأوطان
يالنادر اللي كلمتك تعتمدها
يالراسي اللي لو قسى الوقت ماشان
حقايق صمت الزمن ما جحدها
يالوافي اللي لك من العدل ميزان
من يفقد الوقفات عندك وجدها
رغم الجحود من الليالي والإنسان
لك كل صادق بالنوايب شهدها
ملكت حب الناس في سر وإعلان
شف كثر حبك بالقلوب وعددها
لا مر لاسمك طاري بين الأذهان
كن القلوب مسافرةْ عن بلدها
عند الرجال أغلى من ادموع الاذعان
وعند النساء يرخص لحبك ولدها
ما هو كلام وبوح شاعر بالالحان
لا والذي ساق البروق ورعدها
انك ما بين قلوب وعيون ولسان
حبك تجاوز كل روح وجهدها
واللي يقول الصدق ما هوب غلطان
الله امر باعلانها في مهدها
الشاهد اللي ساق مع غر الامزان
غيث يعيد الكل نفس رغدها
انك ملكت الحب في عدل واحسان
ووعود صدق ما تغير وعدها
تتعب وتشقى في حياتك على شان
ما يشكي الحاجة وحيد فقدها
وشلون ما يبقى لك بشانهم شان
ولك عندهم صدق الشعور وسعدها
يا سيدي والله لو اصدرت ديوان
وشرحت به مواقفك ما حصدها
الله يجنبك البلاوي والاحزان
يا مير نجد وعزها يا سندها
"مدارات شعبية"