حلفت ما أصادقك يا نافخ الكير
أنا صديقي صاحبي حامل المسك
لو كان قالوا من كبار المشاهير
لأن الحديث إيقول يحرق ملابسك
ونصيحتي يا سامعي لك وللغير
أبعد وحذراء صاحب الكير يلمسك
أبعد ولا تكثر عليه المشاوير
لو طولت بك لا محالة يدنسك
واوصيك خلك دائم مع هل الخير
خلك مع أهل الخير والله يحرسك
وأصبر ولو دارت عليك الدواوير
ولابد ما تلقى خوياً يونسك
وسوالف الرديان لقح ومعاشير
ويا كم صديقاً وده إنه يدبسك
وأعلم ترى ما جايك إلا المقادير
وإذا انتهى يومك ترى الموت يدمسك
يجيك ما يعطيك مهله وتفكير
ولا هو يضاحك لك ولا هو مخامسك
أحسب حساب الربح قبل المخاسير
واحذر من الشيطان يكثر وساوسك
وإن طعت شيطانك رماك بزمهرير
ياشين حظك كان ظلت تحرمسك
لعلها تكون عبرة وتذكير
وإذا جلست اعرف من اللي يجالسك
ويا ما حلى يا أبو سعد شبه النير
بأرضٍ خلا ما فيه حابس ويحبسك
اللي عليها ضايلين المناعير
كلا على درب الشكاله يحمّسك
مايل عليك الفيء مع حزة عصير
وجواً عليلٍ مع هبوباً تنسنسك
كنك مخاوي لك جموع وجماهير
وناسة ما حد عليها ينافسك
"مدارات شعبية"