نظم القصيد المعتبر يكتمل في ضرب الأمثال
اللي بها حكمه وتوجيه وابداع ومهاره
يبحث مواضيع كثيره ويدرس بعض الأحوال
ويعطي نتايج ناجحه ما يجي فيها خساره
تطلع معانيه الغزيره بشكلٍ يشرح البال
يطرب لها اللي كل علمٍ يكفيه اختصاره
ما سمع بعلومٍ يسوى لها مطلع ومدخال
يغتاظ منها كل رجالٍ بكبده مراره
الناقد الواعي وقف ضدها والحق ينقال
والا الردى معروف والحر تكفيه الاشاره
يا كثر ما يصدر كلامٍ يردد بين جهال
كلٍ يقول ان المعرفه مع العالم شعاره
ما أحدٍ يصدق كل قولٍ يجي ما عقبه افعال
هذي حقيقه تفضح اللي تغير عن مساره
يبقى الكلام الزين والا الكلام الشين ينزال
وكلٍ حسب عقله يحدد من القول اختياره
العقل نعمه من ولي البشر ما جابه المال
فيه ايتميز من يحكّم ضميره في قراره
دنيا العنا نلقى بها طيبٍ وافي وبطال
وقال المثل معرفة الطيبين اكبر تجاره
واختام قولي كل من طاب يلقى طيب الاعمال
اللي يقدمها مع الناس بسلوب وجداره
"مدارات شعبية"