افرحي يا دار نجد وافرحي يارض الرسالة
والبسي ثوب القصايد دامها بك تستزين
زانت حروف القوافي والوطن نور هلاله
حين مقدم سيدي يا دار حقك تفرحين
مرحباً به في محله يا هلا يا حي فاله
صاحب الراي السديد وصاحب العقل الرزين
من جنوب أرض الوطن من غربها لأقصى شماله
لين شرق المملكة والعاصمة للدار لين
لين باكستان واهله وارضها واقصى جباله
لين دار الهند وحدوده ألين بلاد صين
مرحباً بك في ديارك دوم يا رمز البساله
مرحباً بك كل يوم وكل وقت وكل حين
الولد بشر اخوانه والأبو بشر عياله
في قدومك يابو متعب شعبكم مستبشرين
القصايد تفتخر بك والشعر جاله مجاله
شعرنا فخر ووراثة سابكينه زين زين
وأنت أصل المجد واصل الطيب يا رمز الشكالة
يا فخرنا والله أنك عز كل المسلمين
سيفنا اللي لا التزمنا بنتفيا في ظلاله
صامداً والله يعزه ما تزعزعه السنين
نهرنا اللي لا ظمينا نرتوي صافي زلاله
عزنا وقت الشدايد لا وربي ما يلين
افتخر في مدح مثلك وابتهج حزة قباله
وادعي الله يحفظك وارفع لمولاي اليدين
أنت رمز للأخوة والمحبة والعدالة
دعوتك لا تفرقة ما بين كل الأمتين
تنبذ الارهاب وتحارب مفاهيم الضلالة
قلت للعالم بلا الارهاب ما يقرن بدين
بيض الله وجهك ورسالتك أسمى رسالة
تنبذ أحقاد الأمم والغل والحقد الدفين
ديننا رحمة وحكمة والتسامح هي خصاله
ما استمعنا يابو متعب قول بعض الحاقدين
من نوى ظلم العقيدة ما تحقق له مناله
ما يغيرنا الكثير بديننا متمسكين
ديننا اللي لو نموت ولا نفكر في بداله
نحمد الله من خلقنا للكتاب محافظين
خل حاسدنا بحقده ويتخيل ما بدا له
باعتقاداته وجهله ما حنا متأثرين
ربنا الله خالقي سبحانه وجلا جلاله
والنبي الصادق محمد خير كل المرسلين
"مدارات شعبية"