المال دايم عرضة للتوايح
والعاقل اللي نبهه صوت الأجراس
في وقتنا اللي عامر بالشرايح
عشنا وحنا من مخاليق هالناس
لو مالك المكنوز يملا صفايح
لا توقظه ينهار خلك على ساس
من راس ما له بالغنم والفلايح
اكتب عليه انه معرض للافلاس
غره حلال بالحسابات سايح
لا تغبط المسكين فالوقت حساس
راع الفلايح صفقته اللوايح
حتى قفل فكره وعقله بترباس
الدين خلاّ المال كله سرايح
والسوق للدلال مكسب ونوماس
والعامل اتلا العام بقبض مزايح
والكهربه تضرب به اخماس واسداس
لو قيل بالذكر الموثق مدايح
لاباس لكن ما فهمناه لاباس
طول السنه خسران همّ أو جوايح
ما حصل الأحزة النوم هوجاس
فشيلة بالسوق والحظ طايح
كنه على مال المعازيب حرّاس
والا الغنم قلنا كفايه منايح
قالوا غنيمه قلت للمال محماس
يكفيك يا راع الكرم لك ذبايح
كان انت في ميدان الاجواد عسّاس
والا الرعايا ما لها اليوم صايح
راح الربيع اللي على كل مقياس
البرّ ماغير الرياح النوايح
والحوش منه الجيب بالدين ينداس
يا من غفل عن صايحات اللمايح
اسلم قبل ما تاقع الفاس بالراس
من اليوم يا مجنون الاسهم ورايح
للسكّر العاتي وللضغط مقياس
باكر تشوف المهزله والفضايح
إن عشت والا لذعة البورصة ماس
كل برايه من ورا الوقت مايح
أما سلم والا تدنته الأضراس
ماني وكيل آدم ولكن نصايح
أقولها وانشر صداها على واس
"مدارات شعبية"