يا عين يالي في دجا الليل تبكين
على وليف حيل بينه وبيني
أغلى البشر راحت وأنتِ تشوفين
ما ردها كثر البكا والونين
ومن البكا يا عين لا لا تكفين
عسى دموعك تغسل الهم فيني
ويا دموعي يالي فوق خدي تهلين
احكي وقولي قصتي واسمعيني
الموت جاها أمس الضحى يوم الاثنين
يا موت يالي خذتها ما تجيني
وا حر قلبي يوم شالتها الايدين
وبالقبر حطوها وقلبي حزيني
ودعتها وبداخل القلب جرحين
جرح الفراق وجرح ذكرى السنين
من بعدها من له أباقول تكفين
وشلون ابسمع قولها يا جنين
يا شمعة ضوت حياتي من سنين
يوم انطفت وشلون ابقضي سنيني
هذه مواطي رجلها قبل يومين
اقفت واثرها باقي يحتريني
وذاك الشجر يبكي بذيك البساتين
والنخلة القصيا ذبحها الحنيني
يا عين بعد الغاليه من تشوفين
ما عاد لي بك حاجةٍ اتركيني
يا ليت قبري جنبها يالمصلين
واقول يا دنيا الشقا ودعيني
"مدارات شعبية"