الله يرحم حالنا يا بو عايد
كثرت مشاكينا وتعبن ركبنا
وصعبن علينا لابسات القلايد
إللي تبين أسرارهن من سبننا
نجل العيون مطيبات الوسايد
عفنا نفع ميدانهن وانسحبنا
ومشوارنا محدود ما من بعايد
والموت جهز عسكره في طلبنا
أبصواعق منها تطيح الفقايد
وحنا تغير وضعنا وارتهبنا
قرب وعدنا مع صدوق الوعايد
اللي ليا منه غزانا كسبنا
ما عاد ينفع قول ناقص وزايد
ما فيه قامه يوم شدوا عربنا
صرنا فوائد عقب جمع الفوائد
يا ملتجانا لا تخيب تعبنا
يوم الحساب إللي على الناس كايد
يا مخلص النشبات خلص نشبنا
"مدارات شعبية"