يوم ان بعض الناس وده يتاجر
ويصير شيخ من شيوخ التجاره
قال ابا اساهم مثل غيري واغامر
واودع سنين القهر والمراره
وده يصير بيوم ولد الاكابر
ويصير له عشرين قصر وعماره
ويصير بين رجال الاعمال حاضر
الشهم راعي الطيب يا حي داره
ويقوم ينهي بين ربعه ويامر
امير لو ماله عليهم اماره
راح التداول راح من طيب خاطر
في صالة تقول رمي الجماره
ثم اشترى ثم باع حاضر بحاضر
تاره من الاسمنت والغاز تاره
يلهث ولا حسب حساب الخساير
ما دام هاك الوقت خضرا الاشارة
غدى مهبول بين الاسهم يطامر
باع الحلال وبيته من الثواره
قام يتهبد وبعماها يخاطر
وبكل يد من يدينه زقاره
قلبه على الشاشه وعينه تناظر
مثل القطو لا من لمح زول فاره
إلى كسب غنى من الشوق طاير
وإلى خسر طقت جنوبه حراره
ومن دوشته ينده على حمود ناصر
ومن ربكته يدخل على بيت جاره
وبلحظتين جاوب السوق خاسر
خسارة يا كبرها من خساره
ضاعت جميع أحلام عمره يا ساتر
واسمه غدى طايح وطاح اعتباره
ياللاسف ضاعت فلوسك يا صابر
عود على سنين القهر والمرارة
"عزيزتـي الجزيرة"