بسم الله ابدأ واعتزي في سؤاله
واقول عفوك يا بديع السموات
علم لفاني رج عقلي وهاله
وهلن دموع العين مني سريعات
في يوم جمعة سجلي يا مقاله
يوم من التاريخ هل المقالات
هله على راعي الوفاء والشكالة
عبد الله اللي كل عمره مهمات
من الوكيّل طيبين السلاله
أهل العلوم الطيبات الحسينات
اللي قضى عمره وحصّل مناله
وحصّل على زود المراجل شهادات
تشهد على ماضيه بزة بداله
وتشهد على ما فات كل الإدارات
رجل كريم ويستحي من ظلاله
يا الله عسى قبره جنان مديدات
يفرح إلا جاء الضيف واصبح قباله
تلقى هلا وراء هلا مستهلات
مرحوم ياللي ما نلاقي بداله
من مثل عبد الله بليا مغالات
عيال عمه في منازل عياله
فزاع لا صكت علينا العسيرات
والله يا لو ما أمنت باللي جراله
لا صيح با اعلى الصوت في كل الاوقات
أو صيحت اللي من تبين هباله
عقب العقل كثرت عليه المغبات
ما اصبرك يا نعش الخشب كيف شاله
ما تنكسر مثل القلوب الكسيرات
لو شفت ربعه وانسباه وخواله
وعيال عمه مع كثير الجماعات
يوم أنهم بالقبر حطوا رحاله
وهلت عليه دموع ناس كثيرات
وفروه للقبله وحلت حباله
وسدوا عليه من اللبن سبع لبنات
وشفت القبر يوم اللحد لطس جاله
وردوا ترابه ربعته والقرابات
ويدعون رب البيت يرحم لحاله
ويغفر له الوالي عظيم الكرامات
ثم دمدموا قبره وشيلت طواله
وحطوا على جنب النصايب علامات
والحي مهما عاش هذه مآله
الموت ما عنده لاحد مدارات
يا لله عسى الرحمن عز الجلالة
يغفر ذنوبه يوم بعاث الاموات
هاك الأسد ما مات وهذي عياله
ثلاثة تبرز الى جت ملمات
وصلوا على المختار راعي الرساله
اعداد ما هلن من الوبل زخات
"مدارات شعبية"