البارحه عيا يجي عيني النوم
يا بوي ما جاها الكرى لو قليله
ليا سهرت الليل ما نيب مليوم
فقدت انا يابوي شيخ القبيله
هو شيخنا اللي في المواقيف زيزوم
يحل صعبات الأمور المحيله
ومن جاه يشكي من عنا الوقت مهموم
يشيل همه بين يوم وليله
هو فزعة اللي جاه في الوقت مضيوم
شيخ يشيل الكايده والثقيله
مرحوم يا راعي المواجيب مرحوم
مرحوم يا راعي العلوم الجزيله
مرحوم يا شيخ به الطيب مرسوم
مرحوم يا جدي مزبن دخيله
مرحوم يا راعي الكرم وينك اليوم
شيخ وساسه من شيوخ مهيله
نسل الشيوخ الي بها الطيب مقسوم
نسل الشيوخ أهل السيوف الصقيله
القلب عقب العود يابوي مثلوم
واصبر وكني فوق حامي المليله
والحال عقب الشيخ يا بوي مسموم
حالي عقب فرقاه يا عزتي له
ويالله يالي لاجله نحج ونصوم
يا واحد كل الملا تلتجي له
يا منزل طه والانفال والروم
إنك تسكنه الجنان الظليله
"مدارات شعبية"