يا بايعٍ دينك على شان دنياك
لا تشتري دنياك وتبيع دينك
أما اشتر الثنتين ويطيب مسعاك
والا لحبل الدين شمر يمينك
ما راح من عمرك قطاره تعداك
بس اغنم اللي باقياً من سنينك
عمرك تقافا به دواليب الأفلاك
يمضي عليك أسرع من ارماش عينك
إلى متى في الغي تشعب مطاياك
إلى متى وإبليس باقي خدينك
إلى متى ماشي على خبط عمياك
تتبع هوى نفسك وتتعب قرينك
واعرف ترى للموت حزه وينصاك
ياطاك مثل اللي وطى سابقينك
ان ما تغدى فيك وألا تغشاك
لو ما تجيه ايجيك لو كنت وينك
اللي وطى قبلك من الناس ياطاك
لو تمتلي بالمال كلتا ايدينك
المال لو حزته عن الموت ما غناك
ترحل ومالك يغنمه وارثينك
ترى الشرف والعز لأطعت مولاك
وقضيت عمرك في رضى والدينك
ومديت لاطعام المساكين يمناك
وقضيت مطلب من لفوا قاصدينك
وخلدت في فعل المواجيب ذكراك
وابعدت عن فعل يسود جبينك
والشكر للي في بهاء الحسن سواك
اللي على شدات وقتك يعينك
خلك بعالي نايف الجود مرقاك
تفرح صديقك مع سخط حاسدينك
والصاحب اللي حزة الضيق يجفاك
اقفل خطوط الوصل بينه وبينك
مادام حزات الصعيبات ينساك
وقت الرخاء معلوم كلٍ عيونك
"مدارات شعبية"