أمس الضحى عديت راس الجذيبه
مدهل وحوش فروخها يدهلنه
عيني على درب الحبيب رقيبه
كما رقيب الخلف لعيالهنه
اقنب قنيب الذيب وأهذب هذيبه
ذيب بغا الحولات ما وافقنه
وايق وشاف الجو خال شعيبه
يبغي النجوع النازله وافختنه
لجت ضلوعه يوم جر بطنيبه
مثل الضواري حسهن جضورنه
هنيت منهو داله باللبيبه
ماسال عن ذولا ولا سيل عنه
ولا يفتهم بالوقت وين يغديبه
داله ولوعات الهوى جنبنه
ولا هو بمثل اللي جروحه عطيبه
بيض الخدود بحبهن ولعنه
إذا حصل خطو الشناح العجيبه
ماهي من اللي ثوبهن خبننه
اشقح بياض ما بعد جاب صيبه
ودك عن الشمس الضريره تكنه
هي كيف نفسه ما عليها غصيبه
غصب على المثبور ما تستمنه
من حب له زول يجي من نصيبه
وتلم شمل أهل القلوب المحنه
"مدارات شعبية"