قرب لي النوته وحبر وقرطاس
في داخلي عشرين قافٍ تنادي
تبكي عليه تقول ما فيه مجلاس
لاحيتها والحزن قطّع فوادي
يا بوي جاني بعد فرقاك وسواس
الاحزان بعدك جات جمع وفرادي
عز الله انها طقة جات بالراس
يوم الربوع الليل حلّ السوادي
عساك في الجنة وبنتك لها احساس
احساسي انك في نعيم البرادي
يوم الوفاة وصوت تقطيع الأنفاس
متشهّد ورافع لربك الايادي
مات الكرم وياك يا عدم الاجناس
ودّع منازلنا وكل البلادي
تحت الندا خطين ما بين الاقواس
(محمد بن جفين رعى الشدادي)
لا جات من عقب البطا تمرس امراس
تنزل على بن جفين نصواً عمادي
يوم القسا منصاً لربعه ونوماس
منصا الضعيف اللي حدته الحوادي
يوم الفقر والجوع والناس فلاّس
ما يذبح الا من كبار الثنادي
ولا جيت تبغى البن بعد التعوماس
والكيف يعبا بالدلال الجدادي
والاّ كرم غيره من جملة الناس
وقت الرخاء كل كريم وجوادي
خلد لنا في صفحة العز نبراس
نادر بعصره رجل ما هوب عادي
شيخٍ على شيخٍ وشيخه على ساس
من عصر بن مزحم نديد بن هادي
وابوه من ياخذ على الخيل مرواس
وقت الجهل لاجاء نهار الطرادي
ليا اعتزا من فوق قبّ الافراس
الخيل من شلفاه راحت بيادي
جفين بن سفران قطاع الارماس
عندي عليه اثبات شي وكادي
الحر ولد الحر سفران قرناس
يجدع خيار الصيد وقت الهدادي
اكملتها عشرين بحساب وقياس
ترثي لنا بن جفين رعى الشدادي
"الرأي"