الوسم يا حمدان قرّب حسابه
والليل قام يطول واستبرد الليل
واقفى نظام الصيف وقفت ركابه
والجار عند الجار يبقى التعاليل
في مجلسٍ لضيف مفتوح بابه
ثابت سوات الجدي واليا بدا اسهيل
راع الولع قام يتفقد زهابه
تالي نهار ورحل الهم ترحيل
ممشى طرب هذا السؤال وجوابه
سوالف ارجال ومجالس رجاجيل
اترجع الشايب لزهرة شبابه
وتطري على باله علوم وتماثيل
ساعة زمن مرت مرور السحابه
ما فيه تعديل ولا فيه تبديل
كل من أهل البل ذوده مشابه
وكثر المزايد في ليل المحاويل
ما بينهم بالطيب قدر ومهابه
ودايم غناة النفس هيلٍ بلا كيل
نشا سحاب الخير يا مرحبابه
واستبشرت كل المخاليق بالسيل
حتى الطيور ابكل وادي وغابه
من الطرب قامت تجر المواويل
والروض عقب السيل زانت ثيابه
كنه عليه الزل جملة وتفصيل
"مدارات شعبية"