شعر الإخوانيات من الفنون الجميلة في شعرنا الشعبي.. وفي هذا العدد نقدم قصيدتين الأولى للشاعر تركي بن ماطر الغنامي العتيبي موجهة إلى الشاعر الكبير عبدالله بن ناصر السياري حيث يقول الغنامي:
|
أجي لك يابو خالد لو إني وراي أشغال |
جلوسي معك ساعة وهرجتك تكفيني |
يمين الله المعبود لو هو على فنجال |
يا كنّك معشيني ومصبح مغديني |
كثير الرجال لحال وأنته سنعك لحال |
أبويه على مثلك لك الله موصيني |
وأبحفظ وصاة الشايب إن كان عمري طال |
بعد فيك كل الوصف قد شفته بعيني |
يا أبو مجلسٍ من جاه يلقى علوم رجال |
مرب الشحم والكيف والسمت والديني |
مداهل زحولٍ تنقد الهرج نقد ريال |
هذا والله اللي صدق زينٍ على زيني |
أجي عندهم وأروح ما أوحيت قيل وقال |
ولا تسمع أذني غير علمٍ ينشميني |
طرايف علومٍ ما تجي عقب طول جدال |
سياحة فكر عن معمعة عام الألفيني |
وبأسلوب راق كعادته أجابه الشاعر عبدالله السياري قائلاً:
|
هلا مرحبا بك يابو خالد عدد من قال |
صلاة العشا ليقالو آمين آميني |
وعدد ما سعى بالصلح بين الرجال رجال |
كثر ذا غلاك ومثل ما أغليك تغليني |
أنا أشوف خالد فيك بالطيب والأفعال |
إمشاهدك ينفعني وهرجتك تحييني |
إلى شفت زولك شفت خالد حضر في الحال |
أشوفك وأشوفه كلّكم داخل العيني |
ورثت الوفا والجود من شايبك والخال |
مواريث شيخانٍ على العسر والليني |
ملاذ الضعيف إلى أشلهب الزمان ومال |
على ذبح حيل الكوم والضان عجليني |
هل الماقف المعروف يوم الشراب إوشال |
مطاعين في الهيجا إنحاز المعاديني |
إزيارتك للشايب وفا منك يا رجّال |
كمنّك وفيٍ من رجالٍ وفييني |
وإلى اللقاء مع لون آخر من القصائد المتبادلة قريباً بإذن الله.
|
|
