صوتك علاج القلب والصدر والروح |
يا ضاق صدري والفضا كلّميني |
الضحكة اللي كلها ود ومزوح |
فدوه لها عمري وباقي سنيني |
المشكلة وجهك معي وين ما اروح |
من وين ما وجهت قدام عيني |
غريق حب وماسك له طرف لوح |
أصيح لك بالصوت لا تتركيني |
ردي تراني واهن الحيل مجروح |
قبل النهاية حاولي والحقيني |
إما اتركيني وسط الأمواج مطروح |
وإلا على شط النجاة اسحبيني |
وإلا ترى ذنبك من القلب مسموح |
للموت للبحر الغريق ادفعيني |
تعبت من جرح من العام مفتوح |
تعبت أقول من التعب عالجيني |
مليت من بعدك من السهر والنوح |
خلاص من هذا العذاب ارحميني |
حبك علاج جروح وأسباب لجروح |
لا هو على كيفي ولا في يديني |
والله ما عودت قلبي على البوح |
حبك كتمته بين قلبي وبيني |
ترى الغلا يا صار للناس مفضوح |
تفرح به العذال والحاسديني |
يا اغلا بنات آدم ومن راقوا نوح |
يا وجد حالي من غلاك وحنيني |
ان كان لك في جرح مغليك مصلوح |
في كل ساعة بالرموش اجرحيني |
لا تاخذك رحمة ليا صرت مذبوح |
بسود العيون الناعسات اطعنيني |
يا وردة تاخذ من العطر وتفوح |
بريح النفل والطيب والياسميني |
الشوق والكتمان للروح ذا بوح |
أخشى يجي يوم يبيح كنيني |
أشتاق لك دايم وأنا فيك مشفوح |
شوق الفيافي للمطر صدقيني |
ما طالعت عيني ورى كل مملوح |
لا اللي يبي بعدي ولا اللي يبيني |
جيّرت لك حبي من الروح للروح |
وهذي على عهد المحبة يميني |
فرحان بن قيران بن هندي العنزي |
الحدود الشمالية - عرعر |
|
