مرحوم يا شيخٍ عجايب دلوله

شيخٍ مع الشيخان عطرٍ مجاله

شيخٍ عتيبه بالكمال شهدوا له

ومسنّده بالطيب جده وخاله

وان عمست اشوار العرب عوّدوا له

وان هابوا الحمل المناعير شاله

وزلات ربعه منه دوم محموله

واليا اشتكوا حيف الزمان ارتكاله

يوم الزمان اللي صعابٍ حلوله

ضلعٍ يظل عن الهيافي ظلاله

وان جاء نهارٍ فيه موقف رجوله

يسد بالميقاف لو هو لحاله

من روس قومٍ بالمواقف زحوله

فيهم على الضد المقابل صماله

قد جالهم في ماضي الوقت جوله

يوم ان كلٍ نجدته من حباله

شيخٍ له بكل النواميس طوله

ولا فيه من بعض المعاني جهاله

كم واحدٍ طيّب ولا هوب حوله

يفرق عنه ناصر بسامي خصاله

ناصر ولد متعب تشرف فعوله

ما قط باليمنى قطع في شماله

شيخٍ ليا جاء الضيق ربعه لجوله

عسى الخلايف في غيابه عياله

والله يقبل دعوة اللي دعوا له

بالعفو والغفران عقب ارتحاله

جعله خفافٍ يوم يبعث حموله

مع من يشفّع فيه راع الرسالة

في جنة الفردوس يكتب نزوله

يكتب له الفردوس رب الجلاله

برضاءٍ من الرب وشفاعة رسوله

يغفر له الباري ويلطف بحاله

هذا الذي عقب ارتحاله نقوله

ندعي لكسّاب الثناء والجماله

عساه بالغفران يحسن قبوله

منشي مراويح المطر من خياله

وعداد وفد البيت من كل دوله

صلّوا على اللي جاء بدين العداله

محمد بن محسن بن عمره المقاطي العتيبي

صفحة الجزيرة الرئيسية

رأي الجزيرة