أحلى الأسامي محمد واسم عبدالله

وأنا بقلبي لها الاسمين منزالي

محمد اسم النبي نفديه ونجله

وعبدالله اسم ابو متعب طيب الفالي

وأقول عن خوف لا تلحقني الزله

ما للنبي مثل لا باول ولا تالي

الشعر خيم على تفكيري بظله

وأصبحت أسوق القلم وأمليه من بالي

قاف لفاني وانا ماني بمحر له

كود ان عقلي طرا له شيخ الافعالي

عنيت حاكم وطنا مهبط المله

اللي ليا قال يفعل وقت الاهوالي

يستاهل المدح ابو متعب وكفو له

لو كان وصفه يجي من فوق الامثالي

والله ولا احد بملزمني على والله

انه بقلبي على طول المدى غالي

حاكم صفاته صعيب تحاط بسجله

الربع منها يكفينا عن التالي

شجاع قلبه صخر ما يعرف الذله

كريم كفه بحر للناس مدهالي

ساس الشرف والكرمه والوفا كله

نعم السند والذرى بالمر والحالي

سور الوطن عنده الصعبات منحله

ابن الشيوخ الضعيفة وابو الاطفالي

عز اليتيم وغنى المقلول عن قله

طلق المحيا ما هو بالكبر متعالي

يجونه الشعب بابه ما انغلق لله

يقضي لهم ساير الحاجات بالحالي

قلته ولا لي طمع والبال رامٍ له

يشهد على صدق قولي ربي الوالي

ولا ازهقت روحي على التعبير لا بالله

الشعر جاني سواة الغيم همالي

من قلت مدحي بابو متعب تهين له

ابيات تسبق بعضها يوم تنهالي

البيت منها تقل يهزب رديفٍ له

يقول انا جيت الاول والفخر عالي

الفخر في مدح عاهلنا وعز الله

ان الشعر في مثل شرواه ينقالي

وان الشعر كان ما يطريه ما احسن له

ولا عاد لي فيه مخراج ومدخالي

ومن كان شاعر يعقد القاف ويحله

ما توجه باسم صقر العرب وش نالي

وانا ادري ان ابو متعب رغم وصفٍ له

معروف قبلي ولا يعتاز لأقوالي

لكن بقلبي مكانه لاسم عبدالله

ليا طرت لي تسابق فيها الأمثالي

يالله دعيتك تبقي به وتمهل له

وتحميه من كل شر بكل الأحوالي

سلامة عواد العنزي /سكاكا - الجوف

صفحة الجزيرة الرئيسية

رأي الجزيرة