سلام يا سلمان يسلم محياك |
تسليمه الإسلام خير الدلايل |
يا غيثنا يا ريفنا لا عدمناك |
يا قيفنا عن حر شمس القوايل |
يا مير نجد ومن سكن نجد ينصاك |
راسك يروس أقطاب روس القبايل |
يا خو فهد يا عز من لاذ بحماك |
يا زين من قلت عليه المحايل |
طبعك تمد لطالب العون يمناك |
تعين وتعاون بشتى الوسايل |
كلٍ ليا قابلك يسعد بلقياك |
ما فيك صده عن عيال الحمايل |
كلٍ ليا شاهدك يسعد بروياك |
أنته سندنا وأنت راعي الجمايل |
لك سطوةٍ منها الرجاجيل تخشاك |
ولك هدةٍ تروى السيوف الصقايل |
يا بن الزعيم اللي على الجود وصاك |
عبدالعزيز اليا زمي الضد عايل |
من راس أخو نورة مقرك ومجناك |
ستر البنات منقضات الجدايل |
عبدالعزيز اليا امتلى حوض الإدراك |
يرده ويسقى الضد مر الغلايل |
في نجد ما وحي هرج ذولي وذولاك |
ولا رخص بنجد ولا بغابه بدايل |
صمم وعزم ناحرٍ نجد مناك |
من السيف شد الكور فوق الرحايل |
معه أربعين قالوا أرواحنا فداك |
وادلى الإمام بكلمة الحق قايل |
نبي نعز الدين ونهدم الاشراك |
والله معه وعدى الشريعة ذلايل |
وعقب السرى والسيردارن الأفلاك |
وضوا الرياض وقال راي الصمايل |
وأصبح لنجد ومن سكن نجد ملاك |
وعداه قفت يوم ساق الدبايل |
وأصبح لشرع الله من الظلم فكاك |
ونادى المنادي وأصبح الظلم زايل |
والكل بايع حاكم العدل دكاك |
روس الطغاه مقطعين العقايل |
كسر عصاهم عقب صولات واعراك |
بالسيف فوق الخيل والدم سايل |
مرحوم يا من معشر القوم سماك |
صقر الجزيرة وأنت راعي العدايل |
ومرحوم يا من صار بالعز مبداك |
ما سقت نفسك للخطا والرذايل |
ويوم نها عن نجد قفت مطاياك |
عقبت فيها من يحمل الرسايل |
يوم اتقت شمسك وحنا فقدناك |
قاموا مقامك ما غدا الحكم ضايل |
عسى جنان الخلد يا العود ملفاك |
الله يجيرك من لهيب الشعايل |
وحنا عوضنا يا أبيض الوجه في ابناك |
حكامنا آل سعود سور الدخايل |
الهم مقام مع أهل الحق فتاك |
ولهم على القصار عطف وفضايل |
يا الله تنصرهم على كل شكاك |
وتجعلهم صرح من العز طايل |
تنصربهم دينك على عداه وعداك |
آمين يا منشي صدوق المخايل |
تعز قادتنا على هذاك ورضاك |
وتحمي بلدنا من أخباث الدغايل |
هتاش الهروال |
|
