يا هجوس القاف وينك عن جروحي والطعون

سجل حروف السلامه يوم سمى وابتدى

إسعف المحتار بأمره ضايق البال محزون

ما طلع بيده حلول ولا طلع بيده جدى

غير عبره خانقته وما تبينها العيون

فاجعته أكبر ولا هي بالحميّا والفدى

موت أبوي أكبر مصيبه كانكم لي تسمعون

إن سألتوني عن اللي ضيع أفكاري سدى

ما يشيل الحزن عني لا الطروق ولا اللحون

كان بالمسحوب جبته أو أجيبه بالحدى

ما تهون أيام عطفه والله إنه ما تهون

عن جفاف أوراق وقتي كان ترطيب الندى

حافظٍ لكتاب ربه لا يذم ولا يخون

منهجه نهج الكتاب وفي نبيه إقتدى

عمنا في سحب خيره بالفضيله له مزون

وأمطرت بأرض المعزه وإهتدينا بالهدى

يا يبه دنياي قلي لا فقدتك وش تكون

مظلمه من دون صوتك ما بها صوت وصدى

يا ولي العرش ما بك لا شكوك ولا ضنون

حل غالينا بدارك دار حق لمن غدى

وأنت أرحم من تولى وأمرك بكافٍ ونون

أطلب الجنه لإبوي وأنت أملنا والمدى

من عطاياك العظيمه رحمتك يا خير عون

والعزا لي بعد صفحك عنه يا رب سندى

يا يبه ودعتك الله بالدعاء رغم الطعون

لو قصيدي في وداعك تاج راسي ما بدى

إبراهيم عبدالله السلامة

البدائع

صفحة الجزيرة الرئيسية

رأي الجزيرة