كل المعاني سقتها لجل نرضيك |
والله ما ضيّق خاطرك وانت رايق |
انت الغلا والروح ياروح مغليك |
وانت المطر لاشبّ قلبي حرايق |
يفداك عمري لو تدوسه مواطيك |
أخذ العهد مني وهاك الوثايق |
عمرٍ ملكته ياحبيبي باياديك |
ياليت لو نقدر نزيل العوايق |
لولا الحيا والله والله لابكيك |
دمعٍ تسايل فوق خدي غرايق |
اهلا هلا بك عد مالقلب يطريك |
انت الحبيب اللي له القلب تايق |
حتى بوسط الحلم روحي تناجيك |
يافرحتي لا صار حلمي حقايق |
ياغايتي يامنوتي مقدر أوفيك |
قدرك كبير ومنزلك بالعمايق |
لا قلت أحبك كذبتني هقاويك |
والله أحبك وانت للحب لايق |
مديت لك كفي وأنا الحين ابا ارجيك |
ياليت لو ترحم خفوقي دقايق |
قمت اتخبط بين هذي وهذيك |
ما عدت أميز بين عقل وحمايق |
نايفة نجد |
|
